- बागमती प्रदेश सरकारले चेपाङ समुदायको न्वागी पर्वका अवसरमा बिदा दिने निर्णय गरेको छ।
- भदौ २२ गते चितवन, मकवानपुर र धादिङ जिल्लामा सार्वजनिक बिदा हुनेछ।
- चेपाङ समुदायको संस्कृति संरक्षण र सम्मानका लागि यो बिदा दिइएको हो।
काठमाडौँ । बागमती प्रदेश सरकारले चेपाङ समुदायको प्रमुख सांस्कृतिक पर्व न्वागी अर्थात् छोनामका अवसरमा तीन जिल्लामा सार्वजनिक बिदा दिने निर्णय गरेको छ।
प्रदेश सरकारको निर्णयअनुसार आगामी भदौ २२ गते सोमबार चितवन, मकवानपुर र धादिङ जिल्लामा सार्वजनिक बिदा हुनेछ।
आन्तरिक मामिला तथा कानुन मन्त्रालयले प्रदेश राजपत्रमा सूचना प्रकाशित गर्दै न्वागी पर्वका अवसरमा सम्बन्धित तीन जिल्लामा सार्वजनिक बिदा दिने निर्णय सार्वजनिक गरेको हो।
चेपाङ समुदायले पुस्तौँदेखि आफ्नो मौलिक परम्परा र संस्कृतिअनुसार मनाउँदै आएको न्वागी पर्वको संरक्षण तथा सम्मानका लागि प्रदेश सरकारले सम्बन्धित जिल्लामा बिदा घोषणा गरेको जनाएको छ।
न्वागीलाई चेपाङ समुदायको महत्वपूर्ण सांस्कृतिक पर्वका रूपमा लिइन्छ। पर्वका अवसरमा समुदायले परम्परागत विधि तथा संस्कारअनुसार विभिन्न धार्मिक र सांस्कृतिक गतिविधि गर्दै उत्सव मनाउने गर्छ।
