- ट्रम्प मिडिया कम्पनीले चालू आर्थिक वर्षको दोस्रो त्रैमासिकमा २३ करोड ८० लाख डलर घाटा व्यहोरेको छ।
- क्रिप्टोकरेन्सीको मूल्यमा आएको भारी गिरावटले गर्दा कम्पनीको घाटा गत वर्षको तुलनामा दश गुणा बढेको हो।
- घाटाका बाबजुद कम्पनीको आम्दानी ८९ प्रतिशतले बढेर १७ लाख डलर पुगेको छ भने कुल सम्पत्ति २ अर्ब डलर रहेको छ।
अमेरिकी राष्ट्रपति डोनाल्ड ट्रम्पको सामाजिक सञ्जाल कम्पनीले गएको अप्रिलदेखि जुन महिनाको अवधिमा २३ करोड ८० लाख डलर अर्थात् ३६ अर्ब ३० करोड रुपैयाँ घाटा भएको जनाएको छ ।
सामाजिक सञ्जाल ‘ट्रुथ सोसल’ को मातृ कम्पनी ‘ट्रम्प मिडिया एन्ड टेक्नोलोजी ग्रुप कर्पाेरेशन’ ले चालू आर्थिक वर्षको दोस्रो त्रैमासिकमा यो घाटा व्यहोरेको हो ।
यस अवधिमा कम्पनीले क्रिप्टोकरेन्सीलगायत सञ्चारसँग सम्बन्ध नभएका विभिन्न क्षेत्रमा पनि आफ्नो व्यवसाय विस्तार गरेको थियो ।
कम्पनीका अनुसार आफ्नो स्वामित्वमा रहेका क्रिप्टोकरेन्सीको मूल्यमा आएको ठूलो गिरावटका कारण घाटा बढेको हो । यो घाटा गएको वर्षको यही अवधिको तुलनामा १० गुणाभन्दा धेरै हो ।
यद्यपि दोस्रो त्रैमासमा कम्पनीको आम्दानी १७ लाख डलर पुगेको छ । यो गएको वर्षको यही अवधिको तुलनामा ८९ प्रतिशत धेरै हो ।
कम्पनीले गएको जुन महिनाको अन्त्यसम्ममा आफ्नो कुल सम्पत्ति झन्डै २ अर्ब डलर पुगेको जनाएको छ । त्यसमध्ये नगद, अल्पकालीन लगानी तथा डिजिटल मुद्रासहितका वित्तीय सम्पत्ति झन्डै १ अर्ब ९० करोड डलर बराबर छ ।
ट्रम्प मिडिया कम्पनीले पछिल्लो समय सामाजिक सञ्जाल व्यवसायभन्दा बाहिर क्रिप्टोकरेन्सी, होल्डिङ तथा स्वच्छ ऊर्जा क्षेत्रमा समेत लगानी गर्दै आएको छ । तर कम्पनीले अहिलेसम्म नाफा कमाउन सकेको छैन ।
