- मिडियाको संख्या अत्यधिक बढेकाले यसलाई व्यवस्थित गर्नुपर्ने रास्वपा उपनेता गणेश पराजुलीको भनाइ छ।
- संसदीय पत्रकारितालाई मर्यादित र प्रभावकारी बनाउन न्यूनतम मापदण्ड तय गर्नुपर्नेमा उनले जोड दिएका छन्।
- संसद् सचिवालयसँग समन्वय गरी पत्रकारहरूका लागि आवश्यक प्रशिक्षणको व्यवस्था गरिनुपर्ने उनले बताएका छन्।
काठमाडौ – राष्ट्रिय स्वतन्त्र पार्टीका संसदीय दलका उपनेता गणेश पराजुलीले मिडियाको संख्या अत्यधिक बढेकोले यसलाई व्यवस्थित गर्नुपर्ने बताएका छन्।
सोमबार सञ्चारकर्मीहरूसँगको छलफलमा बोल्दै उनले यस्तो बताएका हुन्। उनले संसदीय मामिला पत्रकारितालाई थप व्यवस्थित, मर्यादित र प्रभावकारी बनाउन न्यूनतम मापदण्ड तय गरिनुपर्ने बताए।
संसदीय मामिलामा रिपोर्टिङ गर्ने सञ्चारकर्मीहरूको भूमिकालाई प्रभावकारी बनाउन संसद् सचिवालयसँग समन्वय गरी आवश्यक प्रशिक्षणको व्यवस्था गर्नुपर्ने उनले बताए।
उनले भने, ‘पहिलेको अवस्थामा एक वा दुईवटा मात्र मिडिया थिए भने आज मिडियाको संख्या अत्याधिक बढेको छ। यसलाई व्यवस्थित बनाउने क्रममा टीओआर कसरी तयार गर्ने, त्यसमा कसरी सुधार गर्ने भन्ने विषय महत्त्वपूर्ण छ। त्यसैगरी, संसदीय मामिलामा भूमिका निर्वाह गर्ने सञ्चारकर्मी साथीहरूले अझ प्रभावकारी रूपमा काम गर्न सकून् भन्ने उद्देश्यले यहाँहरूले नै प्रशिक्षणको आवश्यकता औँल्याउनुभएको छ।
यो वास्तवमै सोचनीय विषय हो। संसद् सचिवालयसँग समन्वय गरी यसलाई कसरी प्रभावकारी रूपमा कार्यान्वयन गर्न सकिन्छ भन्ने पक्षमा पनि हामीले काम गर्नुपर्ने आवश्यकता छ। जवाफदेहिता जति सांसदहरूको छ, त्यति नै सञ्चार जगतको पनि छ।’
सञ्चारमाध्यममाथि अंकुश लगाउन खोजिएको हो कि भन्ने जिज्ञासाको खण्डन गर्दै उनले प्रेस स्वतन्त्रताप्रति पार्टी प्रतिबद्ध रहेको बताए।
