अर्घाखाँची। राष्ट्रिय स्वतन्त्र पार्टी (रास्वपा) अर्घाखाँचीले आगामी प्रतिनिधिसभा निर्वाचनलाई लक्षित गर्दै पारदर्शी, कम खर्चिलो र जनसहभागितामूलक चुनावी अभियान अघि बढाउने अभ्यास सुरु गरेको छ।
रास्वपा अर्घाखाँचीका जिल्ला सभापति तथा प्रतिनिधिसभा सदस्यका उम्मेदवार हरिप्रसाद भुसालले चुनावी प्रयोजनका लागि नयाँ बैंक खाता सञ्चालन गरी आय–व्ययको विवरण पूर्ण रूपमा सार्वजनिक गरिने स्पष्ट प्रतिबद्धता जनाएका छन्। उनले सामाजिक सञ्जालमार्फत सार्वजनिक सन्देश दिँदै “हामी बरु नष्ट हुन्छौँ, तर भ्रष्ट हुँदैनौँ” भन्ने मूल नारासहित चुनाव जित्नका लागि गलत अभ्यास नअपनाइने बताएका हुन्।
भुसालका अनुसार चुनावी अभियान अधिकतम न्यून खर्चमा सम्पन्न गरिने र त्यसमा समर्थक, शुभेच्छुक तथा आम नागरिकको स्वेच्छिक आर्थिक तथा नैतिक सहयोग रहनेछ। अभियानका क्रममा संकलित प्रत्येक रकम र खर्चको विवरण पारदर्शी ढंगले प्रस्तुत गरिने उनको भनाइ छ।
उनले परम्परागत दलहरूले अपनाउँदै आएको महँगो, अपारदर्शी र शक्तिको दुरुपयोग हुने चुनावी संस्कृतिप्रति संकेत गर्दै, इमानदार राजनीति, सुशासन र जवाफदेहिता नै राष्ट्रिय स्वतन्त्र पार्टीको पहिचान भएको हिमालय टाइम्स जिल्ला संवाददातासँग बताएका छन्।
रास्वपाको यो कदमलाई निर्वाचन प्रक्रियामा विश्वास र नैतिकता पुनःस्थापना गर्ने प्रयासका रूपमा हेरिएको छ। अर्घाखाँचीमा पार्टीको अभियान जनमुखी र सिद्धान्तनिष्ठ बनाउने दिशामा यो अभ्यास महत्वपूर्ण देखिन्छ
