मुगु — छायाँनाथ रारा नगरपालिकाका नगरप्रमुख विष्णुकुमार भामले दोस्रो पटक आफ्नो सम्पत्ति विवरण सार्वजनिक गरेका छन्।
नगरप्रमुखको जिम्मेवारी सम्हालेको एक सातामै पहिलो पटक सम्पत्ति विवरण सार्वजनिक गरेर उदाहरण प्रस्तुत गरेका भामले यसपटक जेन–जी समूहको सहकार्यमा आफ्नै कार्यकक्षमा विवरण सार्वजनिक गरेका हुन्।
सार्वजनिक विवरणअनुसार नगरप्रमुख भामसँग १४ तोला सुन, २० तोला चाँदी, ११ लाख रुपैयाँ बैंक ब्यालेन्स तथा नगद मौज्दात रहेको छ। साथै, विभिन्न स्थानमा जग्गा समेत रहेको उल्लेख गरेका छन्।
उनका अनुसार मुगुको साविक कार्कीवाडा गाविसमा ४२,३१३ वर्ग मिटर, साविक श्रीनगर गाविसमा ५५८ वर्ग मिटर, साविक पिना गाविसमा ४,५५८ वर्ग मिटर तथा सुर्खेतको साविक लाटिकोइली गाविसमा दुई कित्ता गरी ३६२ वर्ग मिटर जग्गा रहेको छ।
छायाँनाथ रारा नगरपालिका–४ भामबाडा गाउँमा रहेको सात कोठे घर, गमगढी बजारको आठ कोठे घर तथा नेपालगञ्जको तीन तले घर आमा लालकली भामको नाममा रहेको उल्लेख गरिएको छ। यस्तै, गमगढी बजारको छ कोठे घर श्रीमती अनिता रावलको नाममा रहेको जनाइएको छ।
नगरप्रमुख भामले ती सम्पत्तिमा आफ्नो व्यक्तिगत हकदाबी नरहेको स्पष्ट पार्दै अधिकांश सम्पत्ति पुर्ख्यौली भएको बताएका छन्। आफ्नो नाममा कुनै पनि जग्गा नरहेको उनको भनाइ छ।
कार्यक्रममा जेन–जी समूह मुगुका प्रमुख राजेन्द्र शाहले नगरपालिकामा भएका विकाससम्बन्धी अनियमितताप्रति ध्यानाकर्षण गराएका थिए।
