लुम्बिनी – नेपाल प्रिमियर लिग (एनपीएल) को दोस्रो संस्करणको फाइनल खेलमा लुम्बिनी लायन्सले सुदूरपश्चिम रोयल्सलाई ६ विकेटले पराजित गर्दै उपाधि जितेको छ। त्रिभुवन विश्वविद्यालय अन्तर्राष्ट्रिय क्रिकेट मैदान, कीर्तिपुरमा आज सम्पन्न फाइनल खेलमा लुम्बिनीले एकतर्फी प्रदर्शन गर्दै च्याम्पियन बन्न सफल भएको हो।
फाइनल खेलमा पहिले ब्याटिङ गरेको सुदूरपश्चिम रोयल्स लुम्बिनीका सशक्त बलरहरूको सामु टिक्न सकेन। सुरुदेखि नै दबाबमा परेको रोयल्सको ब्याटिङ लाइनअप ८५ रनमै अलआउट हुन पुग्यो। लुम्बिनीका बलरहरूले सटिक लाइन–लेन्थ र आक्रामक रणनीतिका साथ बलिङ गर्दै विपक्षी टोलीलाई ठूलो स्कोरतर्फ जान नदिएका थिए।
जवाफमा लुम्बिनी लायन्सले लक्ष्य पछ्याउँदा कुनै दबाब महसुस गरेन। ब्याट्सम्यानहरूले संयमित र योजनाबद्ध ब्याटिङ गर्दै मात्र ९ ओभरमै ८६ रन बनाउँदै लक्ष्य पूरा गरे। चार विकेट गुमाए पनि लुम्बिनीले ६ विकेट बाँकी छँदै खेल आफ्नो पक्षमा पार्दै उपाधि सुरक्षित गर्यो।
यस जितसँगै लुम्बिनी लायन्सले एनपीएलको दोस्रो संस्करणको उपाधि आफ्नो नाममा लेखाएको छ। प्रतियोगिताभर निरन्तर सन्तुलित प्रदर्शन गरेको लुम्बिनी फाइनलमा समेत सबै विभागमा प्रभावशाली देखिएको थियो।
फाइनल खेलसँगै देशभर क्रिकेटप्रेमीहरूको उत्साह थियो। काठमाडौँ, बुटवललगायत विभिन्न सहरका सार्वजनिक स्थानमा ठूलो स्क्रिनमार्फत खेल हेरिएको दृश्य देखिएको थियो भने सामाजिक सञ्जालमा पनि लुम्बिनी लायन्सको जितलाई लिएर व्यापक प्रतिक्रिया आएको छ। राष्ट्रिय तथा अन्तर्राष्ट्रिय खेलकुद मिडियाहरूले समेत नेपाली घरेलु लिगको प्रतिस्पर्धात्मक स्तर र दर्शक सहभागिताको प्रशंसा गरेका छन्। साथै सुदूरपश्चिम रोयल्सले पनि आफ्नो उत्कृष्ट प्रदर्सन गर्ने पर्यस गरेको थियो
