काठमाडौ = आइसीसी यू-१९ महिला टी-२० विश्वकप क्रिकेटको दोस्रो संस्करण आजदेखि मलेसियामा सुरु हुँदैछ। यो विश्वकपमा नेपालसहित १६ देशले सहभागिता जनाउँदै छन्। नेपाली महिला क्रिकेटको इतिहासमा पहिलोपटक विश्वकप खेल्न हाजिर नेपालले आज आफ्नो पहिलो खेल बंगलादेशसँग खेल्नेछ।
विश्वकपमा नेपाल छनोट हुने अन्तिम टोली हो, र यो टोलीले आफ्नो प्रतिस्पर्धामा राम्रो प्रदर्शन गर्नको लागि उत्साहित रहेको खेलाडी हरुको भनाइ छ नेपाल र बंगलादेश बीचको खेल मलेसियाको बांगी स्थित मैदानमा आज दिउँसो सवा १२ बजेबाट शुरू हुनेछ।
नेपालको समूह ‘डी’ मा अष्ट्रेलिया, बंगलादेश र स्कटल्यान्ड पनि छन्। नेपालले विश्वकपको पहिलो खेल आज बंगलादेशसँग खेल्दै, आगामी खेलहरूमा स्कटल्यान्ड र अष्ट्रेलियासँग पनि प्रतिस्पर्धा गर्नेछ। नेपाली टोलीका लागि यो एक महत्वपूर्ण अवसर हो, जहाँ उनीहरू आफ्नो प्रदर्शनले विश्व क्रिकेटमा नयाँ पहिचान बनाउने एक अवसर पनि रहने छ ।
समूह चरणमा प्रत्येक टोलीले तीन खेल खेल्नेछन्, र एक समूहबाट शीर्ष तीन टोलीले दोस्रो चरणमा स्थान बनाउन सक्नेछन्। यस विश्वकपमा नेपालले आफ्नो जुझारु प्रदर्शन देखाउँदै भविष्यमा महिला क्रिकेटमा नयाँ मापदण्ड स्थापित गर्ने नेपाल क्रिकेटले आशा सेमेत गरेको छ।
विश्वकपमा १६ टोलीलाई चार समूहमा विभाजन गरिएको छ। समूह ‘ए’ मा भारत, आयोजक मलेसिया, श्रीलङ्का र वेस्ट इन्डिज रहेका छन्। समूह ‘बी’ मा इंग्ल्यान्ड, आयरल्यान्ड, पाकिस्तान र अमेरिका छन् भने समूह ‘सी’ मा न्यूजिल्यान्ड, नाइजेरिया, सामोआ र दक्षिण अफ्रिका रहेका छ्न ।
