अर्घाखाँची – अर्घाखाँची पाणिनी गाउँपालिका–८ का थानेश्वर घिमिरे डेढ वर्षदेखि युनाइटेड अरब इमिरेट्स (यूएई) मा यात्रा प्रतिबन्ध (ट्राभल ब्यान) मा परेका छन् । एक नेपाली महिलाको मृत्यु प्रकरणमा नाम जोडिएपछि उनीमाथि यूएई सरकारले यात्रा प्रतिबन्ध लगाएको हो ।
यूएईस्थित नेपाली दूतावासका अनुसार घिमिरे सँगै बस्दै आएकी एक नेपाली महिलाको शंकास्पद मृत्यु प्रकरणमा जोडिएका थिए । श्रीमान–श्रीमतीबीच झगडा भएपछि ती महिला सडकमा मृत अवस्थामा फेला परेकी थिइन् ।
घटनाबारे घिमिरेले प्रहरीलाई जानकारी गराएपछि उनलाई अनुसन्धानका लागि तीन दिन हिरासतमा राखिएको थियो ।
उनले झगडा भइरहेको बेला आफू शौचालयभित्र रहेको र बाहिर निस्कँदा ती महिला देखिएनन् भनेर बयान दिएका छन् । पछि महिलाका श्रीमान फरार भएका थिए ।
घिमिरेकी दिदी लक्ष्मी घिमिरेका अनुसार भाइ निर्दोष छन् तर यूएईको ट्राभल ब्यानका कारण उनी देश फर्किन वा काम बदल्नसमेत अक्षम छन् । “घटनाबारे प्रहरीलाई जानकारी दिने मानिस नै अहिले डेढ वर्षदेखि रोकिएका छन्, यो ठूलो अन्याय हो,” उनले गुनासो गर्दै भनिन् ।
यूएईस्थित नेपाली दूतावासले भने घटनाको प्रकृति गम्भीर भएकाले स्थानीय कानुनी प्रक्रिया पूरा नभएसम्म यात्रा प्रतिबन्ध हटाउन नसकिने जनाएको छ । दूतावासका अधिकारीका अनुसार यूएईका सम्बन्धित निकायले अनुसन्धान सम्पन्न गरेपछि मात्रै घिमिरेमाथिको प्रतिबन्धबारे निर्णय हुने बताइएको छ ।
थानेश्वर घिमिरे अहिले पनि यूएईमै काम रोकिएको अवस्थामा छन् र कानुनी प्रक्रिया टुंगिन प्रतीक्षारत छन् । परिवारले सरकारले सक्रिय भूमिका खेली निर्दोष नेपाली कामदारलाई न्याय दिलाउन आग्रह गरेका छन् ।
नेपाल सरकारले समेत कूटनीतिक पहल गरी घिमिरेको रिहाइ र न्याय सुनिश्चित गर्न आवश्यक कदम चाल्नुपर्ने माग बढ्दै गएको छ।
