काठमाडौं । राष्ट्रिय स्वतन्त्र पार्टी (रास्वपा) का सभापति तथा पूर्व गृहमन्त्री रवि लामिछाने र पूर्व डिआईजी छविलाल जोशीसँग सम्बन्धित मुद्दाको फाइल झिकाउन उच्च अदालत बुटवल इजलासले आदेश दिएको छ।
सुप्रिम सहकारी संस्थाको रकम ठगी र संगठित अपराधसम्बन्धी मुद्दामा थुनामा रहेका लामिछाने र जोशीले थुनामुक्त हुनसक्ने बिगो बराबर रकम धरौटीमा जम्मा गर्न अनुमति माग गर्दै रिट दायर गरेका थिए। उक्त रिटमा आज इजलासले प्रारम्भिक सुनुवाइ गर्दै जिल्ला अदालत रुपन्देहीले जारी गरेको आदेशसहित सम्पूर्ण फाइल माग गरेको हो।न्यायाधीश वासुदेव आचार्य र ओमप्रसाद अर्यालको इजलासले उक्त आदेश दिएको हो।
यसअघि कात्तिक १३ गते तोकिएको पेसी जोशी पक्षका कानुन व्यवसायीको निवेदनपछि स्थगित गरिएको थियो। त्यसअघि लामिछानेको मुद्दामा न्यायाधीश मिलनकुमार राई र ओमप्रसाद अर्यालको इजलासले जोशीको मुद्दा पनि एकै प्रकृतिको भएकाले दुवै मुद्दा एकैसाथ सुनुवाइ हुने आदेश दिएको थियो।