रतन रावल कर्णाली — मुगुम कार्मारोङ गाउँपालिका–२ मा अवस्थित कोइकी हिमालमा पहिलोपटक सफल आरोहण गरिएको छ । यही कात्तिक ३ गते चार अष्ट्रियन र एक जर्मन नागरिक गरी पाँच जना आरोहीको टोलीले समुद्री सतहदेखि ६ हजार १६९ मिटर उचाइमा रहेको सो हिमालको शिखरमा सफल आरोहण गरेको हो ।
सफल आरोहीहरूमा अष्ट्रियाका एर्विन पल विसम्यान, भ्यालेन्टिन म्याक, स्यान्द्रो फ्रान्ज कान्डुथ, ग्रेगर प्रिबर्निग र जर्मनीका स्टेफन लिब लिन्ड रहेका छन् । उनीहरू रिजन ट्रेक प्रालिको व्यवस्थापनमा नेपाली शेर्पा टोलीसहित आरोहणमा सहभागी भएका थिए ।
स्थानीय बासिन्दा तुण्डुल तामाङले भने, “गाउँकै सामुन्ने रहेको यो हिमालको शिखरमा पहिलो पटक मान्छे पुगेको खबरले हामी हर्षित भएका छौं । यहाँका स्थानीय च्याङ्ग्रा र याक चराउन फेदसम्म पुग्ने गरेका थिए तर शिखरसम्म कोही पुगेको थाहा थिएन । अब त विदेशी आरोही पनि आउनेछन् भन्ने लाग्छ ।”
मुगुम कार्मारोङ गाउँपालिका–२ का पूर्व वडाअध्यक्ष कार्मा तामाङका अनुसार, कोइकी हिमालको पहिलो सफल आरोहणले केवल मुगु होइन, देशकै पर्यटन सम्भावनालाई नयाँ आयाम दिएको छ । “अब यस क्षेत्रको प्रचार–प्रसारमा सरकार र सरोकारवाला निकायले ध्यान दिन जरुरी छ,” उनले भने ।
सफल आरोही मध्ये अष्ट्रियाका २८ वर्षीय सेन्द्रोकले भने, “मैले संसारका थुप्रै हिमाल चढेको छु, तर कोइकी हिमालमा उभिँदा बेग्लै अनुभूति भयो । यो हिमाल सफा, शान्त र सुन्दर छ । हावामा ताजगी छ, कतै फोहर छैन — यस्तो प्राकृतिक शुद्धता मैले पहिलो पटक महसुस गरेँ ।”
उनले स्थानीयको माया र आतिथ्यबाट आफू निकै प्रभावित भएको बताए । “म फर्केर गएपछि आफ्ना साथीहरूलाई पनि यो हिमाल चढ्न प्रेरित गर्नेछु । यहाँको प्रचार बढ्यो भने सयौँ विदेशी पर्यटक आउँछन्,” उनले भने ।
रिजन ट्रेक प्रालिका पथप्रदर्शक पासाङ शेर्पाले भने, आरोहणका क्रममा कुनै ठूला कठिनाइ नपरेको बताए । “मौसम अनुकूल रह्यो, बाटो रमणीय थियो र दृश्य अद्भुत । विदेशी आरोहीहरू अत्यन्तै उत्साहित थिए । उनीहरू फर्कँदा पनि भनिरहेका थिए — हामी फेरि फर्कनेछौं,” उनले सुनाए ।
पर्यटन व्यवसायी राजु कार्कीका अनुसार, पहिलो सफल आरोहणसँगै कोइकी हिमाल अब मुगुको पर्यटन विकासका लागि नयाँ आकर्षण बन्न सक्छ । “यदि अहिले नै प्रचारप्रसारमा जोड दिइयो भने यो हिमाल निकट भविष्यमै अन्तर्राष्ट्रिय आरोहीहरूको नयाँ गन्तव्य बन्न सक्छ,” उनले भने ।
यसरी पुग्न सकिन्छ कोइकी हिमाल
हवाई वा स्थलमार्ग दुवैबाट मुगु पुग्न सकिन्छ ।
नेपालगञ्जबाट रारा विमानस्थल करिब ३५ मिनेटको उडानमार्फत पुगिन्छ । त्यहाँबाट १५–२० मिनेटको जीप यात्रामा सदरमुकाम गमगढी पुग्न सकिन्छ ।
स्थलमार्गबाट यात्रा गर्नेका लागि नेपालगञ्ज वा कोहलपुरबाट बसमार्फत सुर्खेत, दैलेख, कालीकोट हुँदै पहिलो दिन मान्म वा नाग्मा पुगिन्छ । दोस्रो दिन बिहानै हिँडेर जुम्लाको गोठी ज्युला वा बुलबुले हुँदै दिउँसो गमगढी पुगिन्छ ।
त्यहाँ एक रात बास बसेर भोलिपल्ट बिहानै मुगुम कार्मारोङ गाउँपालिकाको छायल बजार, माग्री गाउँ र ढुङ्गेधारा हुँदै रिउस बगर, लादेगाड, चिताई बगर हुँदै तेस्रो दिन साँझ मुगुम गाउँ पुगिन्छ । चौथो दिन बिहानै मुगुम गाउँको पाटन क्षेत्र हुँदै पाँचौँ दिन समुन्द्री सतहदेखि ४ हजार ६०० मिटर उचाइमा रहेको कोइकी हिमालको आधार शिविर पुग्न सकिन्छ ।
