अर्घाखाँची – अर्घाखाँचीको चिदीकामा दुई मोटरसाइकल एकआपसमा ठोक्किँदा दुई जनाको मृत्यु भएको छ भने दुई जना गम्भीर घाइते भएका छन्।
मंगलबार साँझ करिब ५ः२० बजे छत्रदेव गाउँपालिका–१, सौरेखोलास्थित बलकोटमा भएको दुर्घटनामा पाणिनी गाउँपालिका–५, अर्घाखाँचीका २१ वर्षीय तारा बेल्बासे र गुल्मी छत्रकोट गाउँपालिका–६ का ३५ वर्षीय सुमन सुनारको मृत्यु भएको प्रहरीले जनाएको छ।
दुर्घटनामा तारा बेल्बासे र सुमन सुनार सवार मोटरसाइकल आपसमा ठोक्किँदा दुवैजनाको घटनास्थलमै गम्भीर चोटपटक लागी मृत्यु भएको जनाइएको हो।
त्यसैगरी, पछाडि सवार १८ वर्षीया दिपा बेल्बासे (अर्घाखाँची) र ४४ वर्षीय सुरज सुनार (गुल्मी) गम्भीर घाइते भएका छन्। घाइते दुवैजनालाई प्राथमिक उपचारपछि थप उपचारका लागि पाल्पा रिफर गरिएको प्रहरीले जनाएको छ।
दुर्घटनाको कारणबारे अनुसन्धान भइरहेको जिल्ला प्रहरी कार्यालय अर्घाखाँचीले जनाएको छ।