काठमाण्डौ – जेनजी आन्दोलनको घटना जाँचबुझ आयोगले पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकविरुद्धको जाहेरी प्रहरीमै फिर्ता पठाएको छ ।
गएको भदौ २३ र २४ को जेनजी आन्दोलनको घटना जाँचबुझ गर्न सरकारद्वारा गठित आयोगका सदस्य एवम् प्रवक्ता विज्ञानराज शर्माले जाहेरी आयोगको कार्यक्षेत्रमा नपरेकाले जिल्ला प्रहरी परिसर काठमाण्डौमै फिर्ता गरिएको जानकारी दिनुभयो ।
यसअघि जिल्ला प्रहरी परिसर काठमाण्डौमा परेको जाहेरी प्रहरीले दर्ता नगरी आयोगमा पठाएको थियो ।
आयोगले एक विज्ञप्ति निकालेर फौजदारी वारदातमा विस्तृत अनुसन्धान तहकिकात गरी कसुरदार देखिने अवस्थामा अभियोजन समेत लगाउने काम आयोगको कार्यक्षेत्रभित्र नपरेको जनाएको हो ।
आयोगलाई घटनाको भौतिक एवम् मानवीय क्षतिको यथार्थ छानबिन गर्ने, घटनाको कारणका सम्बन्धमा यथार्थ जाँचबुझ गरी त्यसको यकिन राय सुझाव दिनेसहितको प्रतिवेदन पेस गर्ने र भौतिक एवम् मानवीय क्षतिसँग सम्बन्धित सूचना वा निवेदन ग्रहण गरी विश्लेषण गर्ने तथा कारबाही सम्बन्धमा आवश्यक रायदिने कार्यादेश पाएको विज्ञप्तिमा उल्लेख छ ।
