काठमाडौं । नेकपा (माओवादी केन्द्र) को केन्द्रीय समितिको सातौं पूर्ण बैठक बिहीबारदेखि काठमाडौँको प्रज्ञा भवन, कमलादीमा शुरू भएको छ ।
बैठकलाई सम्बोधन गर्दै पार्टी अध्यक्ष पुष्पकमल दाहाल ‘प्रचण्ड’ ले राजनीतिक एवं संगठनात्मक प्रस्ताव प्रस्तुत गर्नुभयो । उहाँले अहिलेको केन्द्रीय समिति विघटन गरी विशेष महाधिवेशनमार्फत नयाँ संरचना बनाउनुपर्ने बताउँदै, आफ्नो नेतृत्वमा आयोजक कमिटी गठन गर्ने प्रस्ताव समेत राख्नुभयो ।
अध्यक्ष दाहालले निर्धारित समयमा नै निर्वाचन सम्पन्न गर्नुपर्नेमा जोड दिँदै पार्टीको सम्पूर्ण ध्यान निर्वाचनमा केन्द्रीत गर्न आवश्यक रहेको स्पष्ट पार्नुभयो । उहाँले वर्तमान राजनीतिक अवस्था र जेनजी आन्दोलनले सिर्जना गरेको परिस्थितिबारे समेत धारणा राख्दै देश अहिले इतिहासकै गम्भीर सङ्कटमा रहेको बताउनुभयो ।
“यस्तो अवस्थामा म जिम्मेवारीबाट भाग्दिनँ, तर अध्यक्ष पदमा मात्र टाँस्सिन पनि चाहन्नँ,” दाहालले बैठकलाई सम्बोधन गर्दै भन्नुभयो ।
पार्टीका अनुसार अध्यक्ष दाहालले प्रस्तुत गर्नुभएको प्रस्तावमाथि प्रदेशगत रूपमा प्रतिनिधि विभाजन गरेर छलफल गरिनेछ । छलफलपछि समूहगत रिपोर्टिङ पुनः बैठकमा पेस गरिने बताइएको छ ।