काठमाडौं । महानगरपालिका–१६, नागढुंगाबाट प्रहरीले करिब ४ करोड ९६ लाख रुपैयाँ बराबरको सुन, सवारीसाधन र नगद बरामद गरेको छ ।
जिल्ला प्रहरी परिसर, काठमाडौंका अनुसार २०८१ भदौ १७ गते राति करिब ११:३० बजे नागढुंगास्थित चेकपोष्टमा जाँच गर्ने क्रममा बा ६ ख ५७५३ नम्बरको टाटा सुमो गाडीमा विशेष चेकजाँच गर्दा सो सामान बरामद गरिएको हो । गाडीमा सवार चन्द्र कुमार श्रेष्ठ र उनका छोरा राजकुमार श्रेष्ठलाई नियन्त्रणमा लिएर थप अनुसन्धान भइरहेको प्रहरीले जनाएको छ ।
बरामद विवरणअनुसार, प्रहरीले नेपाली रुपैयाँ ४,८५,५०,००० (चार करोड पचासी लाख पचास हजार) बराबरको सुन जस्तो देखिने पहेँलो धातु ६१५६.९२ ग्राम (६ किलो १५६ ग्राम ९२ तोला) फेला पारेको छ । साथै सुन जस्तो देखिने पहेँलो धातु १९९.२ ग्रिन (१९९ ग्राम २ तोला), नगद नेपाली रुपैयाँ १०,५००, बा ६ ख ५७५३ नम्बरको टाटा सुमो गाडी, सुजुकी सेलिरियो गाडीको धनी प्रमाणपत्र र सुजुकी सेलिरियो गाडीका चाबी दुई थान पनि बरामद भएको प्रहरीले जनाएको छ ।
प्रहरीले पक्राउ परेका व्यक्तिहरूलाई आवश्यक कानूनी कारबाहीका लागि थप अनुसन्धान जारी रहेको जानकारी दिएको छ ।
