सुनसरी । सुनसरीको भोक्राहा नरसिंह गाउँपालिका–३ जलुवाटोलस्थित पूर्व–पश्चिम राजमार्गमा यात्रुबाहक बस र माइक्रोबस आपसमा ठोक्किँदा तीन जनाको मृत्यु भएको छ भने १५ जना घाइते भएका छन्।
जिल्ला प्रहरी कार्यालय सुनसरीका प्रवक्ता डीएसपी योगराज खतिवडाका अनुसार, काँकडभिट्टाबाट दिक्तेलतर्फ जाँदै गरेको मे १ ख १७९९ नम्बरको यात्रुबाहक बस र विपरीत दिशाबाट आइरहेको प्रदेश २–०१–००१ ज ००४७ नम्बरको माइक्रोबस आज बिहान करिब ९ बजे एकआपसमा ठोक्किएका हुन्।
उक्त दुर्घटनामा मृत्यु हुनेहरुको परिचय तत्काल खुल्न सकेको छैन। घाइतेहरुको इनरुवा अस्पताल, विराटनगर न्यूरो अस्पताल र नोबेल अस्पतालमा उपचार भइरहेको प्रहरीले जनाएको छ।
बस चालक झापा जिल्ला, अर्जुनधारा नगरपालिका–१ का ३५ वर्षीय गोपाल अधिकारीलाई प्रहरीले नियन्त्रणमा लिएको छ। प्रारम्भिक अनुसन्धानअनुसार सडकमा हतारमा ओभरटेक गर्ने क्रममा दुर्घटना भएको हुन सक्ने अनुमान गरिएको छ। घटनाको विस्तृत अनुसन्धान भइरहेको प्रहरीको भनाइ छ।