काठमाडौँ, – हालै काठमाडौंको तीनकुने क्षेत्रमा भएको आपराधिक घटनालाई लिएर गृह मन्त्रालयले प्रतिक्रिया जनाएको छ। गृहमन्त्री रमेश लेखकले हिंसा र आपराधिक क्रियाकलापलाई कुनै पनि धर्म, जाति वा आस्थासँग जोडेर हेर्नु गलत हुने स्पष्ट पारेका छन्।
सोमबार प्रतिनिधिसभाको बैठकमा सांसदहरूले उठाएका प्रश्नको जवाफ दिँदै गृहमन्त्री लेखकले भने, “कुनै पनि अपराध वा हिंसात्मक घटनालाई धर्मसँग जोड्ने प्रयास गर्नु गैरजिम्मेवार व्यवहार हो। अपराधलाई अपराधकै रूपमा हेरिनुपर्छ।”
“सरकार कानूनको शासनमा विश्वास राख्छ,” उनले भने, “कसैको आस्था, धर्म वा समुदायमाथि प्रश्न उठाउने अधिकार कसैलाई छैन। अपराध जेसुकै कारणले भएको होस्, त्यसमा संलग्न जो भए पनि कानुनी दायरामा ल्याइनेछ।”
सरकारले तीनकुने घटनाको अनुसन्धान तीव्र रूपमा अगाडि बढाएको गृहमन्त्रीले जानकारी दिए। घटनामा संलग्नको खोजी र कारबाहीका लागि सुरक्षा निकाय सक्रिय रहेको बताएका छ्न ।