नयाँ दिल्ली – परराष्ट्रमन्त्री आरजु राणा देउवा भारतको राजधानी नयाँ दिल्ली पुगेकी छन्। झारखण्डस्थित बाबा वैद्यनाथधाममा दर्शन तथा पूजापछि उनी आज अपराह्न नयाँ दिल्ली पुगेको उनको सचिवालयले जनाएको छ।
नयाँ दिल्लीस्थित इन्दिरा गान्धी अन्तर्राष्ट्रिय विमानस्थलमा मन्त्री राणालाई भारतको विदेश मन्त्रालयका अतिरिक्त सचिव मनु महावर तथा भारतका लागि नेपाली राजदूत शङ्कर शर्माले स्वागत गरे।
मन्त्री राणा ‘द अब्जर्भर रिसर्च फाउन्डेसन’ (ओआरएफ) द्वारा मार्च १७ देखि १९ सम्म आयोजना हुने राइसिना संवादमा सहभागी हुनेछिन्। उक्त कार्यक्रममा जलवायु परिवर्तन तथा दक्षिण एसियाको प्राथमिकतासम्बन्धी सत्रमा नेपालका तर्फबाट सम्बोधन गर्ने कार्यक्रम छ। साथै, उनले ‘डिजिटल पब्लिक इन्फ्रास्ट्रक्चर कन्क्लेभ’ लाई पनि सम्बोधन गर्नेछिन्।
यस क्रममा मन्त्री राणाले भारतका विदेशमन्त्री एस. जयशङ्करसहित विभिन्न मित्रराष्ट्रका समकक्षीहरूसँग द्विपक्षीय भेटवार्ता गर्ने कार्यक्रम छ। राइसिना संवादमा विभिन्न देशका प्रधानमन्त्री, विदेशमन्त्री, नेता तथा नीति निर्माताहरूको सहभागिता रहनेछ।
