काठमाडौं । जल तथा मौसम विज्ञान विभाग मौसम पूर्वानुमान महाशाखाले हाल देशमा पश्चिमी वायुको प्रभाव रहेको जनाएको छ । महाशाखाका अनुसार, कोशी प्रदेश लगायत देशका पहाडी भूभागमा आंशिक बदली रही बाँकी भूभागमा मौसम मुख्यतया सफा रहेको छ । तराईका केही स्थानमा हुस्सु लागेको छ ।
आज दिउँसो कोशी, बागमती र गण्डकी प्रदेशका पहाडी भूभागका एकदुई स्थानमा चट्याङसहित हल्का वर्षाको सम्भावना छ । साथै, देशका उच्च पहाडी तथा हिमाली भूभागका थोरै स्थानमा हल्का हिमपात हुने सम्भावना छ ।
राति भने कोशी, गण्डकी र कर्णाली प्रदेशका हिमाली क्षेत्रमा आंशिकदेखि साधारणतया बदली रही एकदुई स्थानमा हल्का हिमपात हुने देखिन्छ । पहाडी क्षेत्रमा पनि आंशिकदेखि साधारणतया बदली रहने छ ।
मौसम विभागले यातायात तथा बाह्य गतिविधिहरू गर्दा सतर्कता अपनाउन सुझाव दिएको छ । विशेष गरी हिमाली तथा उच्च पहाडी क्षेत्रमा यात्रा गर्ने व्यक्तिहरूलाई मौसमी अवस्थाको अद्यावधिक जानकारी लिन र आवश्यक सावधानी बरत्न महाशाखाले सल्लाह दिएको छ ।
