बारा – सुधार केन्द्रमै कुटपिट गरी एक युवाको हत्या गरिएको छ। कलैया उपमहानगरपालिका-९ का ३७ वर्षीय प्रदीपप्रसाद मण्डलको तीन दिनअघि मृत्यु भएको हो। मण्डल पन्ध्र दिनअघि मात्रै नवजन्म पुन:स्थापना केन्द्र, कलैया-१ मा भर्ना भएका थिए।
निर्दय कुटपिटपछि मृत्यु
सुधार केन्द्रकै व्यक्ति तथा कर्मचारीहरूले मण्डललाई क्रूर रूपमा कुटपिट गरेको आफन्तले आरोप लगाएका छन्। गम्भीर अवस्थामा रहेका उनलाई प्रारम्भिक उपचारका लागि कलैया सिटी अस्पताल लगिएको थियो। अवस्था जटिल भएपछि उनलाई प्रादेशिक अस्पताल कलैयामा सारियो, तर त्यहीँ उपचारकै क्रममा उनको मृत्यु भयो।
सात जना पक्राउ
घटनामा संलग्न भएको आरोपमा प्रहरीले सात जनालाई नियन्त्रणमा लिएको छ। पक्राउ पर्नेमा—
1. सरफराज मन्सुर (१९) – कलैया-३
2. निरज सर्राफ (२२) – कलैया-४
3. आशु मिया शेख (२०) – कलैया-६
4. अरुण सर्राफ (२४) – कलैया-१
5. प्रमेश्वर साह (२१) – कलैया-२
6. सागर गुप्ता (१९) – कलैया-२
7. तमन्ना अली (२९) – कलैया-३
प्रहरीको ढिलासुस्ती र नयाँ एसपीको कार्यसम्पादनमाथि प्रश्न
फागुन २ गते कुटपिटबाट मृत्यु हुँदा पनि प्रहरी घटनाप्रति बेखबर थियो। बारा प्रहरीको नेतृत्व हालै मात्र प्रहरी उपरीक्षक (एसपी) सन्तोष तामाङले सम्हालेका छन्। कार्यसम्पादनमा आलोचित रहेका तामाङ प्रधानमन्त्री केपी ओलीका पूर्व पीएसओ भएको र सोही नाताका कारण आकर्षक पोस्टिङ पाएको चर्चा छ।
घटनाबारे थप अनुसन्धान जारी
प्रहरीले कर्तव्य ज्यान मुद्दा दर्ता गरी अनुसन्धान अघि बढाएको जनाएको छ। मृतकका आफन्तले निष्पक्ष छानबिन र दोषीलाई कडा कारबाहीको माग गरेका छन्।
(नवीनतम जानकारीका लागि अपडेट जारी राख्नेछौं।)