विराटनगर – माओवादी केन्द्रका अध्यक्ष पुष्पकमल दाहाल ‘प्रचण्ड’ले आगामी स्थानीय तहको निर्वाचनमा आफ्नो पार्टीले कम्तीमा २५० पालिकामा विजय हासिल गर्दै पहिलो पार्टी बन्ने दाबी गरेका छन्। मोरङको ग्रामथान गाउँपालिका–५ तेतेरियामा आयोजित खबरदारी सभालाई सम्बोधन गर्दै उनले २०७९ को निर्वाचनमा १२२ पालिकामा विजय हासिल गरेको माओवादीले यसपटक १२३ पालिकासहित थप उचाइ प्राप्त गर्ने विश्वास व्यक्त गरे।
प्रचण्डले १६ मंसिरमा सम्पन्न उपनिर्वाचनबाट माओवादीले विरोधीहरूलाई प्रभावशाली जवाफ दिएको बताउँदै ग्रामथान र उदयपुरका जितहरूले पार्टीलाई नयाँ उचाइ दिएको दाबी गरे। ‘पूर्वले माओवादीलाई संख्या र लोकप्रिय मत दुबैमा पहिलो पार्टी बनाएको छ,’ उनले भने।
अध्यक्ष प्रचण्डले माओवादी कमजोर भएको भन्दै फैलाइएको अफवाहलाई खण्डन गर्दै अब पार्टीले आफ्नै बलबुतामा अघि बढ्ने र भ्रष्टाचारको जरा उखेलेर देशलाई राजनीतिक परिवर्तनको पूर्ण अनुभूति गराउने प्रतिवद्धता जनाए।
ग्रामथानबासीले माओवादीलाई ठूलो साथ दिएको उल्लेख गर्दै उनले जनताको समस्या समाधानका लागि आफ्नो निवास खुला रहने प्रतिवद्धता जनाए। ‘२०६४ को जनमत र वर्तमान परिस्थितिमा हाम्रो सुझबुझपूर्ण चेतना मिल्यो भने नेपाललाई परिवर्तनको नयाँ मोडमा लैजान सक्छौं,’ उनले भने।
