मुगु — हिमाली जिल्ला मुगुको छायाँनाथ रारा नगरपालिका–८ झ्यारी गाउँमा महादेव युवा क्लबले स्थानीय विकास र सरसफाइमा उल्लेखनीय पहल गरेको छ।
देउसी–भैलो खेलेर संकलन गरिएको रकम प्रयोग गरी बर्खायामले बगाएका बाटोघाटो र काठे पुल–पुलेसाको मर्मत सम्पन्न गरिएको क्लबले जनाएको छ।
क्लबका अध्यक्ष सुरेश रावलको नेतृत्व र सचिव डिजन रावलको समन्वयमा झ्यारी गाउँ सरसफाइ अभियान पनि सँगै चलाइएकाले स्थानीयले अभियानलाई उत्साहपूर्ण समर्थन जनाएका छन्।
समाजमा सकारात्मक रूपान्तरण ल्याउने उद्देश्यसहित थालिएको अभियानमा गाउँकै बासिन्दादेखि स्थानीय जनप्रतिनिधिसम्म सक्रिय रुपमा सहभागी भएका छन्।
दलित फोकामा रहेको काठे पुलको साँघु र घट्ट खोलामा रहेको अर्को काठे पुल समेत पुनःमर्मत गरिएको क्लबले जनाएको छ। देउसी–भैलोबाट उठेको रकमले यो काम सम्भव भएको र स्थानीयको सहयोगले अभियान सहज बनेको सचिव रावलले जानकारी दिए।
महादेव युवा क्लबले अब आगामी दिनमा महिनाको प्रत्येक शनिबार नियमित रूपमा गाउँ सरसफाइ गर्ने म्यान्डेट तय गरेको छ। साथै, नेपालको सुन्दरतम गन्तव्य मानिने राराताल नजिकैको गाउँ भएकाले महिनाको अन्तिम शनिबार राराताल क्षेत्रमा समेत सरसफाइ अभियान सञ्चालन गर्ने योजनाबारे क्लबले जानकारी दिएको छ।
स्थानीयले युवा क्लबको पहलकदमीलाई गाउँ विकास, स्वच्छता र पर्यटन प्रवर्द्धनतर्फको सकारात्मक कदमका रूपमा प्रशंसा गरेका छन्।
