- भोटेकोशी बाढीपछि त्रिशूली र नारायणी नदी किनारबाट हालसम्म ६४ वटा शव फेला परेका छन्।
- भरतपुर अस्पतालको शवगृह भरिएकाले अब फेला पर्ने शव औद्योगिक प्रतिष्ठानमा व्यवस्थापन गरिनेछ।
- बेपत्ताहरूको खोजीका लागि तीनवटै सुरक्षा निकाय निरन्तर परिचालन भइरहेका छन्।
काठमाडौं ।भोटेकोशी नदीमा आएको बाढीपछि त्रिशूली र नारायणी नदीको तटीय क्षेत्रमा मानवीय क्षतिको भयावह अवस्था देखिएको छ । यी दुई नदीका किनारबाट मात्रै हालसम्म ६४ शव फेला परेका छन् ।
फेला परेका शवलाई भरतपुर अस्पतालको शवगृहमा राखिँदै आए पनि अब त्यहाँ थप शव राख्न सकिने अवस्था छैन । शवगृहको क्षमता भरिएपछि आगामी दिनमा फेला पर्ने शवलाई औद्योगिक प्रतिष्ठानको कार्यालयमा व्यवस्थापन गर्ने तयारी गरिएको छ ।
जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलले नदी किनारबाट बरामद भएका शवहरू भरतपुर अस्पतालमा राखिएको जानकारी दिए ।
पौडेलका अनुसार तनहुँमा फेला परेका नौ शवसमेत चितवन ल्याइएको थियो । तर भरतपुरमा शव राख्ने पर्याप्त स्थान नभएपछि ती शव पुनः तनहुँ नै पठाइएको हो ।
यसैबीच, नदीमा बगेका तथा बेपत्ता भएका व्यक्तिको खोजीका लागि जिल्लामा रहेका तीनवटै सुरक्षा निकाय परिचालन भएका छन् । उनीहरूले नदीका विभिन्न किनारमा शवको खोजीलाई निरन्तरता दिएका छन् ।
