- जहाजमा कफी पोखिएर घाइते भएकी यात्रुलाई कतार एयरवेजले साढे २ करोड बढी क्षतिपूर्ति दिने फैसला भएको छ।
- अदालतले मोन्ट्रियल कन्भेन्सन र उपभोक्ता संरक्षण ऐन बमोजिम उक्त रकम तिर्न एयरवेजलाई आदेश दिएको हो।
- तीन वर्षअघि यात्रु प्रिती थापामाथि जहाजका कर्मचारीले कफी पोखिदिएपछि उहाँले कानुनी उपचार खोज्नुभएको थियो।
काठमाण्डौ – जहाजभित्र कफी पोखिएर घाइते भएकी यात्रुलाई कतार एयरवेजले साढे २ करोड रुपैयाँभन्दा बढी क्षतिपूर्ति दिनुपर्ने भएको छ ।
उपभोक्ता अदालतका न्यायाधीश दिवाकर भट्ट, गेहेन्द्रराज रेग्मी र आनन्दराज पोखरेलको हिजोको इजलासले २ करोड ६१ लाख ५२ हजार ४०६ रुपैयाँ क्षतिपूर्ति दिनुपर्ने फैसला गरेको हो ।
कतार एयरवेजलाई मोन्ट्रियल कन्भेन्सन अनुसार २ करोड ४१ लाख ५२ हजार ४०६ रुपैयाँ र उपभोक्ता संरक्षक ऐन अनुसार थप २० लाख रुपैयाँ क्षतिपूर्ति तिराउन अदालतले आदेश दिएको छ ।
झण्डै तीन वर्षअघि बोस्टनबाट दोहा हुँदै काठमाण्डौ फर्किने क्रममा ललितपुरकी प्रिती थापा कतार एयरवेजको जहाजमा चालक दलकै सदस्यबाट कफी पोखिएर घाइते हुनुभएको थियो ।
उहाँले २० लाख अमेरिकी डलर क्षतिपूर्ति माग गर्दै मुद्दा दायर गर्नुभएको थियो ।
यसअघि थापाले एयरवेजसँग आन्तरिक रूपमै क्षतिपूर्ति दाबी गरे पनि कम्पनी तयार नभएपछि अदालत जानुभएको हो ।
उहाँले उपभोक्ता संरक्षण ऐन र मोन्ट्रियल कन्भेन्सन अनुसार क्षतिपूर्ति माग गर्नुभएको थियो ।
