काठमाडौँ। पद होइन, व्यवहारले व्यक्तित्व चिनिन्छ भन्ने उदाहरण दिएजस्तै लुम्बिनी प्रदेशका मुख्यमन्त्री चेतनारायण आचार्यले सोमबार जनसरोकारको नयाँ उदाहरण प्रस्तुत गर्नुभएको छ।
काठमाडौँबाट भैरहवा जाँदै गर्दा मुख्यमन्त्री आचार्यले त्रिभुवन अन्तर्राष्ट्रिय विमानस्थलको भिआइपी कक्ष प्रयोग नगरी आम यात्रुसँगै प्रतिक्षा कक्षमै बस्नुभएको हो। अन्य यात्रुहरूसँग सामान्य कुर्सीमा बस्दै उडानको पर्खाइ गर्नुहुने आचार्यलाई देखेर उपस्थितहरूले “मुख्यमन्त्री भएर पनि यति सरल?” भन्दै प्रशंसा गरेका थिए।
स्रोतका अनुसार उहाँले यात्राको सम्पूर्ण प्रक्रिया अन्य यात्रु सरह पूरा गर्नुभयो—सामान जाँचदेखि बोर्डिङ पाससम्म कुनै विशेष सुविधा प्रयोग नगरी। मुख्यमन्त्री सचिवालयका अनुसार, “जनताको सेवक भनेर चुनीएका व्यक्ति जनतामै मिसिनुपर्छ भन्ने आचार्यको व्यक्तिगत सिद्धान्त” हो यो।
मुख्यमन्त्री आचार्यको यो व्यवहारले नेताहरू र उच्च पदाधिकारीहरूबीच पनि जनसरोकार र सादगीपनको नयाँ दृष्टान्त स्थापना गरेको छ।
तस्बिर: मुख्यमन्त्रीकाे सचिवालय