काठमाडौं । राष्ट्र, राष्ट्रियता, धर्म, संस्कृति र नागरिक बचाउ महाअभियानका संयोजक दुर्गा प्रसाईँले नेपालमा वैदिक हिन्दू अधिराज्य स्थापनाका लागि आन्दोलन सुरू गर्ने घोषणा गरेका छन् । मंगलबार पत्रकार सम्मेलन गर्दै उनले दसैं, तिहार र छठपछि वैदिक सनातन हिन्दू राष्ट्र घोषणा नगरेसम्म आन्दोलन नरोकिने चेतावनी दिए ।
“किरात र बौद्धलाई समेत समेटेर वैदिक हिन्दू अधिराज्य घोषणा नगरी अब विश्राम लिन्नौँ । स्टाटस लेखेर होइन, सडकबाट आन्दोलन गर्छौं,” प्रसाईँले भने ।
उनले हालको सरकारले जेन–जी आन्दोलनलाई हाइज्याक गरेको आरोप लगाए । “जेन–जीलाई हाइज्याक गरेर बारबरा र समता फाउन्डेसनका सुकिला–मुखिला मन्त्री बनेका छन् । अहिले बनेको सरकार जेन–जीको होइन,” प्रसाईँको भनाइ छ ।
प्रसाईँले जेन–जी आन्दोलनको उद्देश्य र परिणाम फरक दिशामा गइसकेको दाबी गर्दै त्यससँगै नेपालमा विदेशी हस्तक्षेप बढेको आरोप पनि लगाए । प्रधानमन्त्री सुशीला कार्की, गृहमन्त्री ओमप्रकाश अर्याल, ऊर्जा मन्त्री कुलमान घिसिङ, काठमाडौं महानगर प्रमुख बालेन्द्र शाहलगायतमाथि उनले आन्दोलनप्रति गम्भीर प्रश्न उठाए ।
उनले गोविन्द केसीलाई पछ्याउँदै प्रधानमन्त्री कार्कीले मेडिकल कलेज खोल्न नदिने अडान लिएको आरोप लगाए । साथै, देशलाई आजको अवस्थामा पुर्याउन हात कनकमणि दीक्षित, कल्याण श्रेष्ठ र कार्की स्वयं जिम्मेवार रहेको प्रसाईँको दाबी छ ।
“आन्दोलन सुरु भएपछि कलिला बालबालिकामाथि बर्बरतापूर्वक दमन भयो । कोही नेतृत्वमा आएनन्, हामी रमिते मात्र भयौं । भोलिपल्ट सिंहदरबार, सर्वोच्च अदालतमा आगजनी भयो, त्यो त अकल्पनीय थियो,” प्रसाईँले भने ।
उनले हालको सरकारलाई “विदेशी फाउन्डेसनको सरकार” भन्दै वैदिक अधिराज्य स्थापनाबाहेक अब अन्य विकल्प नरहेको दोहोर्याए ।