अफगानिस्तान – अफगानिस्तानमा गएको ६.० रिक्टर स्केलको शक्तिशाली भूकम्पमा मृत्यु हुनेको संख्या बढ्दै १,१२४ पुगेको छ भने घाइते तीन हजार दुई सयभन्दा बढी पुगेका छन् ।
भूकम्पका कारण करिब आठ हजार घरधुरी पूर्ण रूपमा ध्वस्त भएका छन् । कुनार र नंगरहार प्रान्तमा सबैभन्दा बढी क्षति भएको र धेरै गाउँ पूर्ण रूपमा ध्वस्त भएका अन्तर्राष्ट्रिय सञ्चारमाध्यमहरूले जनाएका छन् । उद्धार टोलीलाई दुर्गम भौगोलिक अवस्था, भत्किएका सडक र खराब मौसमका कारण प्रभावित क्षेत्रमा पुग्न कठिन भइरहेको छ ।
उद्धार गरेर नजिकैका अस्पतालमा लैजाने काम भइरहेको भए पनि कमजोर स्वास्थ्य संरचनाका कारण थप जोखिम बढेको छ र विशेष गरी महिला र बालबालिका बढी प्रभावित भएका छन् ।
तालिबान सरकारले तत्काल अन्तर्राष्ट्रिय सहयोगको अपिल गरेको छ । संयुक्त राष्ट्रसंघले पाँच मिलियन अमेरिकी डलर आपतकालीन सहयोग उपलब्ध गराएको छ भने बेलायतले एक मिलियन पाउण्ड बराबरको सहयोग दिने घोषणा गरेको छ ।
भारत, चीन, युरोपेली संघ, पाकिस्तान, इरान र संयुक्त अरब इमिरेट्सलगायतका देशहरूले खाद्यान्न, औषधि, तम्बू र उद्धार टोली पठाइरहेका छन् । युनिसेफ, डब्लुएचओलगायतका अन्तर्राष्ट्रिय संस्थाहरूले पनि आपतकालीन स्वास्थ्य टोली, तम्बू र सरसफाइ सामग्री पठाएका छन् । तर भत्किएका पूर्वाधार र दुर्गम भूगोलका कारण अझै धेरै गाउँमा उद्धारकार्य सुस्त भइरहेको जनाइएको छ ।