बुटवल — रूपन्देही प्रहरीले नक्कली शैक्षिक प्रमाणपत्र प्रकरणमा थप एक जनालाई पक्राउ गरेको छ । यसअघि भैरहवाबाट भारतका एक युवक पक्राउ परेका थिए ।
पक्राउ पर्नेमा चितवनको कालिका नगरपालिका–५ पदमपुर निवासी ५० वर्षीय हरिप्रसाद कँडेल रहेका छन् । उनी राष्ट्रिय स्वतन्त्र पार्टी (रास्वपा) बागमती प्रदेश प्रशिक्षण विभागका प्रमुखसमेत हुन् ।
भारतको कानपुर निवासी २५ वर्षीय अभिषेक यादवले दिएको बयानका आधारमा प्रहरीले कँडेललाई बिहीबार राति चितवनबाट पक्राउ गरी रूपन्देही ल्याएको प्रहरी नायब उपरीक्षक (डीएसपी) सुरज कार्कीले जानकारी दिए । कँडेल कलेज कोर्ष नेपाल प्रालिका सञ्चालक पनि हुन् ।
यसअघि साउन ३० गते यादवलाई हजारौं नक्कली शैक्षिक प्रमाणपत्र, स्ट्याम्प, होलोग्राम र स्टीकरसहित पक्राउ गरिएको थियो । अनुसन्धानका क्रममा यादवले कँडेलको संलग्नता भएको स्वीकारेपछि प्रहरीले उनलाई पक्राउ गरेको हो ।
प्रहरीका अनुसार कँडेलले चितवनमा सञ्चालन गरेको शैक्षिक परामर्श केन्द्रमार्फत नक्कली प्रमाणपत्र बनाउने र कारोबार गर्दै आएको खुल्न आएको छ । उनी यसअघि अख्तियार दुरुपयोग अनुसन्धान आयोगको छानबिनमा शिक्षक हुन अयोग्य ठहरिएका थिए र त्यसपछि शिक्षण पेसा छोडेका थिए ।
