काठमाडौ – हुलाकी सडकअन्तर्गत सिरहा र धनुषा जोड्ने १३ वर्षदेखि निर्माणाधीन कमला पुल निर्माण कम्पनीले काम रोकेपछि ठेक्का सम्झौता तोड्ने तयारी थालेको हुलाकी राजमार्ग निर्देशनालय योजना कार्यालय जनकपुरले जनाएको हो ।
निर्माण कम्पनी ‘लुम्बिनी बिल्डर्स’ लाई आउँदो असार मसान्तसम्म भासिएको पुलको पुनःनिर्माण सम्मन्न गरिसक्ने गरी अन्तिम पटकलाई ठेक्का सम्झौता भएकोमो कम्पनीले महिनादिन अघिदेखि काम ठप्प गरेपछि ठेक्का सम्झौता रद्द गरी कारबाही प्रक्रिया अघि बढाइएको निर्देशनालयका योजना प्रमुख कृष्णकुमार महतोले बताउनु भयको छ ।
यसअघि निर्माण कम्पनी र बिमा कम्पनीबीचको विवाद उच्च अदालत पाटनसम्म पुगेको थियो ।
पुल निर्माणको क्रममा पुलको दुईवटा पाएर भासिएपछि निर्माण कम्पनीले बिमाबापतको रकम दाबी गरेको थियो । मुद्दा अदालतमा विचाराधीन भएकाले निर्माण सम्झौता र कारबाही प्रक्रिया के हुने भन्नेबारेमा निर्देशनालयले कानूनी परामर्श गरिरहेको प्रमुख महतोले बताउनुभयो ।
पुलको निर्माणको अन्तिम चरणमा रहेको बेला बाढीले क्षति पुर्याएपछि कम्पनीले क्षतिबापत बिमाबाट पाउनुपर्ने आठ करोड रकम नपाएकाले आफूहरू अदालत जानुपरेको निर्माण कम्पनीका साइट इञ्चार्ज सुदीप थापाले बताउनुभयो । २०६८ सालमा तीन वर्षभित्र पुल निर्माण गरिसक्ने सम्झौता भएको थियो । ‘पप्पु कन्ट्रक्सन’ले पुल अलपत्र पारेपछि बाँकी काम ‘लुम्बिनी बिल्डर्स’ले गर्दै आएको थियो ।
