बुटवल, – कोहलपुरबाट प्रकाशित हुने निष्पक्ष दर्पण राष्ट्रिय दैनिकका संवाददाता तथा बाँके जिल्ला शाखाका पूर्व अध्यक्ष एवं लुम्बिनी प्रदेश सदस्य श्रमजीवी पत्रकार शुभाराम विश्वकर्मामाथि प्रमुख जिल्ला अधिकारी धर्मराज जोशीले गरेको अवाञ्छित व्यवहारप्रति राष्ट्रिय दलित पत्रकार संघ, लुम्बिनी प्रदेश समितिले गम्भीर ध्यानाकर्षण जनाएको छ।
विज्ञप्तिमा जनाइए अनुसार पत्रकार विश्वकर्माले नागरिक समस्यासम्बन्धी समाचार संप्रेषणका लागि प्रमुख जिल्ला अधिकारी जोशीलाई फोन गर्दा उहाँले अमर्यादित व्यवहार गरेका थिए। यसप्रति दुःख व्यक्त गर्दै संघले प्रमुख जिल्ला अधिकारीको व्यवहार प्रेस स्वतन्त्रताको विरोधमा रहेको र यसले दलित पत्रकारहरूमाथि दुव्र्यवहार बढाउने खतरा रहेको उल्लेख गरेको छ।
संघले घटनाप्रति आपत्ति जनाउँदै प्रमुख जिल्ला अधिकारी जोशीले आफ्नो धारणा सार्वजनिक रूपमा स्पष्ट पार्नुपर्ने माग राखेको छ। साथै, घटनालाई लिएर आवश्यक कारबाही नभए जिल्लाभर चरणबद्ध आन्दोलनमा उत्रिने चेतावनी समेत दिएको छ।
राष्ट्रिय दलित पत्रकार संघ, लुम्बिनी प्रदेश समितिका सचिव अनिल नेपालीद्वारा हस्ताक्षरित विज्ञप्तिमा पत्रकार सुरक्षाको सवालमा आफूहरु चुप बस्न नसकिने स्पष्ट पारेका छ्न।