जुम्ला – जुम्लामा स्याउको बिरुवामा किरा लाग्न थालेको छ । तिला गाउँपालिका–४ नुवाकोटसहितका अग्लो क्षेत्रमा किसानका स्याउबारीमा बिरुवामा किरा लागेको छ ।
आफ्नो बगैँचामा अत्यधिक मात्रामा किरा लागेर हैरान बनाएको स्थानीय किसान निराजन गौतमले जानकारी दिनुभयो । उहाँले फल्ने र नफल्ने गरेर २५० स्याउका बिरुवा लगाएकामा किराले स्याउ बिरुवाको रुखमा जाली लगाएर बिरुवा नष्ट गरिरहेका जानकारी दिनु भयो।
जिल्ला कृषि विकास कार्यालयले किरा लागेको क्षेत्रमा अनुगमन गरेर कसरी समस्या समाधान गर्ने भनेर अगाडि बढ्ने बताएको छ ।
कार्यालय प्रमुख रामभक्त अधिकारीका अनुसार कार्यालयमा प्राप्त जानकारी अनुसार किराको अध्ययन गर्न टोली जानुपर्ने अवस्था रहेकाले किसानसँग सहकार्य गरेर अवलोकनमा जाने तयारी भइरहेको छ ।
कृषि विकास कार्यालय जुम्लाका प्राविधिक लक्षिराम महतका अनुसार यो किरालाई पाल तड्ने किरा भनिन्छ । यो किराले स्याउको टुप्पोमा पाल तड्ने, रुखमै जालो बनाएर अण्डा पारेर किरा उत्पादन गर्ने र स्याउको पात तथा बिरुवा सखाप पार्ने गर्दछ । तिला–४ नुवाकोटमा रहेको महादेवमा रहेको बगैँचासँगै अन्य ठाउँमा पनि यस्तो समस्या देखिएको छ ।
