काठमाण्डौ – सिद्धार्थ राजमार्गअन्तर्गत पाल्पाको सिद्धबाबामा निर्माण भइरहेको सुरुङमार्गको मुख्य सुरुङ ११ गते छिचोल्ने तयारी भएको छ। सुरुङको मुख्य छिचोल्ने काम लगभग पूरा भइसकेको छ, अब केवल दुई मिटर मात्र बाँकी रहेको छ।
यसअघि माघ ८ गतेलाई तय गरिएको थियो, तर प्रधानमन्त्री केपी शर्मा ओलीको व्यस्तताका कारण ११ गतेलाई सरेको हो।
प्रधानमन्त्री ओलीको पूजा पश्चात् मुख्य सुरुङ छिचोल्ने कार्य सम्पन्न हुनेछ। सुरुङमार्गको लम्बाई ११ सय २६ मिटर र चौडाई साढे १० मिटर रहेको छ। उद्धार सुरुङका रूपमा चिनिएका तीनवटा बाइपास सुरुङ पहिले नै छिचोलिएका छन्।
सुरुङमार्गको भौतिक प्रगति ३९ प्रतिशत भइसकेको जानकारी आयोजना प्रमुख कृष्णराज अधिकारीले दिएका छन्।
सिद्धबाबा क्षेत्रको यस सुरुङमार्ग निर्माण कार्यको म्याद २०८३ सालको चैत ८ गतेसम्म रहेको छ। सुरुङमार्गले पाल्पा, रुपन्देही, गुल्मी, अर्घाखाँची, स्याङ्जा, पोखरा, बागलुङलगायतका क्षेत्रका गाडीहरूको आवागमनमा राहत पुर्याउनेछ।
