बाँके – जिल्ला सुर्खेत, भेरीगंगा नगरपालिका–७ काठेघारीका ४१ वर्षीय राम बहादुर बुढा क्षेत्रीलाई विभिन्न विदेशी नम्बरको ह्वाट्सएप प्रयोग गरी फिरौती मागेको आरोपमा पक्राउ गरिएको छ। उनले आफूलाई भारतीय अपराधी लोरेन्स बिस्नोई र अनमोल बिस्नोईको नाममा परिचय दिँदै पाँच करोड भारतीय रुपैयाँ फिरौती मागेका थिए। रकम नदिएमा गम्भीर परिणाम भोग्नुपर्ने धम्कीसमेत दिएका थिए। प्रारम्भिक अनुसन्धानमा उनको मोबाइल जाँच गर्दा विदेशी नम्बरको ह्वाट्सएप खाता खोलिएको र त्यसबाट फिरौती सम्बन्धी सन्देश पठाइएको प्रमाण फेला परेको र उनका बारेमा थप अनुसन्धान जारी रहेको प्रहरीले बताएको छ।
लोरेन्स बिस्नोई एक भारतीय अपराधी हुन्, जसले हत्या र फिरौती माग्ने जस्ता गम्भीर अपराधहरू गरेका छन् र हाल भारतीय कारागारमा छन्। उनमाथि पञ्जाबी गायक सिद्धू मुसेवालाको हत्या र भारतीय अभिनेता सलमान खानलाई मार्ने षड्यन्त्र गरेको आरोप रहेको छ। उनका भाई अनमोल बिस्नोईले लोरेन्स जेलमा रहँदा विभिन्न व्यापारी तथा उद्योगीहरूलाई धम्क्याएर फिरौती असुल्ने काम गरेका थिए ।
राम बहादुर बुढा क्षेत्री नेपालका विभिन्न स्थानहरूमा आपराधिक क्रियाकलापहरूमा संलग्न व्यक्ति रहेको प्रहरीले अनुसन्धानमा खुलासा गरेको छ । उनले पहिले पनि मानव बेचबिखन, धम्की, जबरजस्ती चन्दा असुली, फिरौती असुली र हत्या जस्ता गम्भीर आरोपमा मुद्दा खेपिसके प्रहरीले जनाएको छ । उनी नेपाल आर्मीमा केही समय सेवा गरी भागेपछि विभिन्न आपराधिक समूहहरूसँग मिलेर अपराध गर्दै आएका र अपराधका लागि उनले भारतीय आधार कार्ड तथा विभिन्न विदेशी नम्बरका ह्वाट्सएप खाता प्रयोग गर्ने गरेको अनुसन्धानबाट खुलेको प्रहरी निरीक्षक हरि भट्टराईले जानकारी दिएका छ्न।
