अर्घाखाँची – सन्धिखर्क नगरपालिका वडा नं. ७ का अध्यक्ष तथा विधान व्यवस्थापन समितिका संयोजक चुरा ब. केसीले समतामूलक एवम् शोषणरहित समाज निर्माण गर्न आवश्यक रहेको बताउनुभएको छ।
अर्घाखाँचीको सुपा देउराली मन्दिर परिसरमा बिटिस काउन्सिल र दलित लाइभ म्याटरको सहयोगमा रूपान्तरण लागि आवाज नेपालद्वारा आयोजित धार्मिक सम्पदामा भइरहेको जातीय विभेद विरुद्ध निर्वाचित जनप्रतिनिधिको भूमिका विषयक कार्यक्रममा बोल्दै अध्यक्ष केसीले समाज रूपान्तरण र सामाजिक न्यायका लागि पुरानो मानसिकता त्यागी दृष्टिकोणमा परिवर्तन गर्नुपर्ने बताउनुभयो। उहाँले धार्मिक क्षेत्रका नाममा हुने विभेद अन्त्य गरी समतामूलक समाज निर्माण गर्न सबैको मनोवृत्तिमा परिवर्तन आवश्यक रहेको उल्लेख गर्नुभयो।
कार्यक्रममा अध्यक्ष केसीले नेपालको संविधान २०७२ ले दलित समुदायको हकअधिकार सुनिश्चित गर्न महत्त्वपूर्ण प्रावधानहरू राखेको उल्लेख गर्नुभयो। संविधानले स्थानीय तहमा कम्तीमा एक जना दलित महिला अनिवार्य रूपमा निर्वाचित हुनुपर्ने व्यवस्था गरेको भन्दै यसले समावेशीकरणलाई प्रवर्द्धन गरेको बताउनुभयो। साथै, सभ्य र समतामूलक समाज निर्माणका लागि आफू निरन्तर क्रियाशील रहेको धारणा राख्नुभयो।
कार्यक्रम संयोजक अनिल नेपालीको अध्यक्षता तथा नवीन रसाइलीको सञ्चालनमा सम्पन्न कार्यक्रममा सितगंगा नगरपालिका वडा नं. २ का सदस्य नेत्र ब. गुरूङ, विभिन्न सरोकारवाला निकायका प्रतिनिधि तथा स्थानीय महिला अगुवाहरूको उपस्थिति रहेको थियो।
