अफगानिस्तान = अफगानिस्तानको पूर्वी क्षेत्रमा गएको शक्तिशाली भूकम्पका कारण ठूलो जनधनको क्षति भएको छ। आइतबार राति नङ्गरहार र कुनार प्रान्त केन्द्रबिन्दु रहेको ६.० म्याग्निच्युडको भूकम्पमा कम्तीमा २५० जनाको ज्यान गएको र ५०० भन्दा बढी घाइते भएको पुष्टि भएको छ।
अमेरिकी भूकम्प केन्द्र (USGS) का अनुसार भूकम्पको केन्द्र जलालाबाद सहर नजिकै सतहभन्दा झण्डै ८ देखि १० किलोमिटर गहिराइमा थियो। सतह नजिकै भूकम्प गएको कारण भवन, घर र अन्य संरचनामा ठूलो क्षति पुगेको छ।
तालिवान सरकारका प्रवक्ता जबीउल्लाह मुजाहिदले सामाजिक सञ्जालमार्फत् जीवन र सम्पत्तिमा ठूलो क्षति भएको जनाउँदै उद्धार तथा राहत कार्यलाई तीव्रता दिइएको जानकारी दिएका छ्न । स्थानीय सुरक्षाकर्मी, स्वास्थ्यकर्मी र राहत संस्था प्रभावित क्षेत्रमा पुगेर उद्धारमा खटिएको जनाएका छ्न।
भूकम्पपछि दुईवटा पराकम्प समेत महसुस गरिएको अधिकारीहरूले जनाएका छन्। यसले उद्धार कार्य अझै कठिन बनाएको छ। मृतक र घाइतेहरूको संख्या अझै बढ्न सक्ने अनुमान गरिएको छ।
अफगानिस्तान भूकम्पीय हिसाबले संवेदनशील क्षेत्र भएकाले यहाँ पटक–पटक ठूलो क्षतिको कारण बन्ने भूकम्प आउने गरेको छ।
