- कम्युनिजमलाई ट्रम्पले विश्वयुद्धभन्दा ठूलो खतरा बताउनुभएको छ।
- नयाँ आप्रवासीबाट अमेरिकी जीवनशैलीमा खतरा बढेको उहाँको दाबी छ।
- अमेरिका कहिल्यै कम्युनिस्ट देश नबन्ने उहाँले प्रतिबद्धता जनाउनुभयो।
अमेरिकी राष्ट्रपति डोनाल्ड ट्रम्पले कम्युनिजमलाई अमेरिकाका लागि विश्वयुद्धभन्दा पनि ठूलो खतरा भएको बताउनुभएको छ ।
अमेरिकी स्वतन्त्रताको २५०औँ वार्षिकोत्सवका अवसरमा आयोजित कार्यक्रममा बोल्दै उहाँले आफ्नो देशको जीवनशैली र सफलतासँग असहमत विचार बोकेर आउने केही नयाँ आप्रवासीबाट देशमा साम्यवादको खतरा बढ्दै गएको दाबी गर्नुभयो । कम्युनिजम अमेरिकी स्वतन्त्रतामाथिको घातक खतरा भएको र यो प्रथम विश्वयुद्ध, दोस्रो विश्वयुद्ध, पर्ल हार्बर वा सेप्टेम्बर ११ को आक्रमणभन्दा समेत ठूलो भएको उहाँको दाबी छ ।
साथै अमेरिका कहिल्यै कम्युनिस्ट देश नबन्ने प्रतिबद्धता पनि उहाँले दोहोर्याउनुभयो । अमेरिकी सेनाको शक्ति र इतिहासको उच्च प्रशंसा गर्दै ट्रम्पले विश्वकै सबैभन्दा शक्तिशाली सेना निर्माण गरेको बताउनुभयो । दुई विश्वयुद्ध जितेको उल्लेख गर्दै उहाँले शीतयुद्धपछि अमेरिकाका शत्रुहरू इतिहासको गहिराइमा हराएको दाबी गर्नुभयो ।
भेनेजुएलालाई एकै दिनमा पराजित गरेको र इरानलाई कडा प्रहार गरिएको उहाँको भनाई छ । ट्रम्पले अमेरिकाको २५० वर्षे इतिहासमा उल्लेख्य प्रगति भएको र यो विश्वकै सबैभन्दा पुरानो गणतन्त्र, सबैभन्दा स्वतन्त्र जनता र सबैभन्दा न्यायपूर्ण संविधान भएको राष्ट्र रहेको दाबी पनि गर्नुभयो ।
