खिम खड्का
२१ असार, गुल्मी । निर्माणाधीन जिल्ला अस्पताल गुल्मीको निर्माण कार्यमा अत्यन्तै सुस्तता देखिएको छ । २०७८ साल असार १८ गते सम्झौता भई २०८० असार १७ गते सम्ममा सम्पन्न भैसक्नुपर्ने भवन २ पटक म्याद भपिदा पनि पुन म्याद थपको तयारीमा छ । आजभन्दा ४ बर्ष अगाडि २०७८ असार १८ मा ५० सैयाका सुविधा सम्पन्न अस्पताल निर्माण गर्ने गरि वानिया जेभी हेटौंडा मकवानपुरले भ्याट बाहेक २५ करोड ९५ लाख ६४ हजार २ सय ३ रुपैयामा सम्झौता गरेको यो अस्पताल सम्झौता अनुसार सम्पन्न गर्नुपर्ने मितिले २ बर्ष म्याद नागिसक्दा समेत सम्पन्न हुने टुङ्गो छैन ।
२०८० असारमा म्याद सकिए पश्चात पहिलो पटक १ बर्ष र दोश्रो पटक ६ महिना म्याद थप माग्दा समेत सम्पन्न गर्न नसकिएकोले अब तेश्रो पटक म्याद थपको तयारीमा रहेको इन्जिनियर अरविन्द्र चौधरीले बताए । उनका अनुसार हालसम्म अस्पताल निर्माणमा ८६ प्रतिशत भौतिक प्रगति र ८४ प्रतिशत आर्थिक प्रगति भएको छ । आगामी दिनमा निर्माण कार्यमा कुनै समस्या नदेखिए आगामी २०८२ को दशैसम्म सम्पन्न गरिसक्ने इन्जिनियर चौधरीले बताए ।
