काठमाडौ – काठमाडौं महानगरपालिकाका मेयर बालेन साहले सरकारको गलत सूचना प्रवाह र भ्रामक प्रचारविरुद्ध कडा प्रतिक्रिया दिएका छन्। उनले सरकारकै नीति, निर्णय र कमजोरीका कारण महानगरलाई नाकाबन्दी लगाउने प्रयास भएको आरोप लगाउँदै भ्रष्टाचारविरुद्ध आफू कुनै पनि हालतमा सम्झौता नगर्ने भन्दै सामाजिक संजालमा उल्लेख गरेका छ्न ।
मेयर साहले सरकारबाट लगातार भ्रम फैलाइएको भन्दै भ्यू टावरको नक्सा पास, कार्यकारी प्रमुख हटाउने निर्णय, कर्मचारी व्यवस्थापन, ऐनको गलत व्याख्या, छानबिन प्रतिवेदन तथा मन्त्रीहरूसँग समन्वय जस्ता विषयमा सरकारकै गैरजिम्मेवारी स्पष्ट भएको बताएका छन्।
उनका अनुसार भ्यू टावरको नक्सा पास गर्ने अधिकार मेयरसँग नभएर कार्यकारीले लिने निर्णय हो। तर, सरकार र उसका निकटका शक्तिहरूले जनतामा भ्रम फैलाउने रणनीति लिएको उनले आरोप लगाए। यस्तै, कार्यकारी प्रमुख टिक्न नसकेको विषयलाई महानगरकै कमजोरीजस्तो देखाउने प्रयास भएको भन्दै उनले भ्रष्टाचारमा मुछिएकाले हटाउनु परे पनि सरकार आफैंले दुईजनालाई हटाउँदा भने प्रश्न नउठाइने विडम्बना रहेको बताए।
सरकारले राजधानीमा कर्मचारी पठाउन नसक्नु लज्जास्पद रहेको उनको भनाइ छ। कानुनअनुसार प्रमुख प्रशासकीय अधिकृत नियुक्त गर्ने जिम्मेवारी सरकारकै भए पनि त्यो नगरेर महानगरलाई झूटो आरोप लगाइएको बालेनको दाबी छ। उनले छानबिन प्रतिवेदन बनेकै छैन भने त्यसलाई लुकाएको भन्नु अर्को ठूलो भ्रम भएको बताएका छ्न ।
बालेनले प्रधानमन्त्री केपी शर्मा ओलीलाई प्रत्यक्ष सम्बोधन गर्दै सरकारको असक्षमता र पूर्वाग्रही सोचले सुशासनमा अवरोध पुर्याएको उल्लेख गरेका छ्न । उनले भ्रष्टाचारविरुद्धको लडाइँ कुनै हालतमा रोक्न नसक्ने बताउँदै “महानगरलाई जति नाकाबन्दी लगाए पनि हामी झुक्दैनौँ, सुशासन कायम गरेरै छोड्छु,” भन्दै सामाजिक संजाल फेसबुक्मा पोस्ट गरेका छ्न
मेयर बालेनको पोस्ट
भ्रमको खेतिमा पीएचडी पाउन मिल्ने हो भने अहिलेको सरकारलाई दिए हुन्छ । उदाहरणहरू :
१. भ्यू टावरको नक्सा पासको स्वीकृति मेयरले दिएको भन्ने प्रचारित भ्रम
कहिले देखी नक्सापास मेयरले गर्न थाले ? सामान्य कानुनको ज्ञान राख्नेले पनि भन्न सक्छ कि यसको अधिकार मेयरसँग हुँदैन । कानुनले यही भन्छ । अनि यो Public Private Partnership ले नक्सापास गर्ने अधिकार कार्यपालिकालाई दिइएको छ । अनि नक्सापास गर्न बसेको व्यक्ति स्वयंले नक्सापास गरिसकेपछि पनि बारम्बार दुई महिनासम्म पीपीपीमा कसरी नक्सापासको काम गराउने भन्ने विषयमा बैठक बसेको प्रमाण हामीसँग सुरक्षित छ ।
२. कार्यकारी टिक्दैन भनेर फैलाउन खोजिएको भ्रम
अहिलेसम्मको हाम्रो कार्यकालमा ४ जना कार्यकारी हटेका छन् । ४ मध्ये २ लाई हटाउनुको कारण उनीहरू भ्रष्टाचारमा संलग्न रहेको भनेर हो । के कार्यकारी टिक्छन् भन्ने देखाउन हामीले भ्रष्टहरूलाई संरक्षण गरिराख्नु पर्ने हो ? २ जनालाई सरकारले हटाएको हो, त्यो पनि महानगरलाई जानकारीसमेत नदिएर ।
हामीले भ्रष्टाचारमा जोडिएकाले हटाएका हौँ । सरकारले के कारण हटायो ? हामीले २ जना भ्रष्टहरूलाई हटाउँदा कार्यकारी टिक्न दिएन भन्ने सरकारले उत्तिनै संख्यामा तर असल काम गरेर बसेकालाई हटाउँदा काठमाण्डौँमा असल कार्यकारी टिक्न सरकारले नै दिदैन भन्ने अर्थ लाग्दैन र ? यदि ति २ जना मध्ये कुनै एक कार्यकारी नहटाएको भए यो कुरा नै आउदैन थियो त ।
३. काठमाण्डौँमा कार्यकारी जना मान्दैनन् भन्ने लज्जास्पद, लाचार र गैरजिम्मेवार भनाई
सरकारले आफु मातहतका एकजना कर्मचारीलाई आवश्यकता अनुसार काममा लगाउन सक्ने रैनछ भन्ने त यहाँबाट नै पुष्टि भयो । अहिले कर्मचारी जान मान्दैनन् भन्दै राजधानीको महानगरमा कर्मचारी पठाउन नसक्ने सरकारले भोलि दंगाग्रस्त क्षेत्रमा सिडिओ जान मानेनन् भनेर पठाउन नसक्ला, अपराध रोक्न पुलिस जान सकेन भनेर पठाउन नसक्ला । एउटा घातक उदाहरण त नवलपरासी पश्चिमको सामूहिक झडपले पनि देखाएको छ ।
आफ्नो कर्मचारीमा नियन्त्रण नभएको, कर्मचारीको विश्वासमा यतिसम्म गिरेको सरकारले समृद्धि ल्याइदिन्छ भनेर हामीले पत्याइदिनु पर्ने ?
४. ऐनले पालिकालाई नै निमित्त तोकेर काम गर्ने अधिकार दिएको छ भन्ने फैलाइएको भ्रम
स्थानीय सरकार सञ्चालन ऐन, २०७४ को दफा ८४ को ४ ले कार्यकारी नियुक्ती नभए सम्मको लागि नेपाल सरकारले निजामती सेवाको कुनै अधिकृत कर्मचारीलाई प्रमुख प्रशासकीय अधिकृतकारूपमा खटाउन सक्छ भनिएको छ । सरकारले यहिसमेत गरेको छैन, बरू उल्टै मेयरले चाह्यो भने राख्न सक्छ भन्ने भ्रम फैलाइदैछ ।
सोही ऐनले दिएको अधिकार प्रयोग गरेर नेपाल सरकारले प्रमुख प्रशासकीय तोकिदिनु पर्नेमा सो नगरि प्रतिवेदन आए पछि भनेर आफ्नो गैरजिम्मेवारीलाई लुकाइरहेको छ ।
५. कार्यकारीको छानविनको रिपोर्ट लुकाइयो भन्ने भ्रम
लुकाउनलाई त हुनु पर्यो नि, होइन । रिपोर्ट बनेकै छैन, लुकाइयो भन्ने भ्रम फैलाइन्छ ।
६. मन्त्रीसँग समन्वयन गर्नुपर्यो
मन्त्रीसँग समन्वयन गर्नु भनेको के हो ? पत्र लेख्ने, आधिकारिक संयन्त्रबाट सम्पर्क गर्ने, त्यहि होइन ? विधि र वैधानिकतालाई समन्वयनसमेतको मान्यता नदिएर के व्यक्तिगत अन्तरंगमात्र खोजेको हो सरकारले ? हामीले मन्त्रीलाई पटक पटक पत्र लेखेको, आधिकारिक संयन्त्रबाट सम्पर्क गरेका छौँ । थप समन्वयन नखोजौँ, विधि र जिम्मेवारी खोजौँ ।
प्रधानमन्त्री केपी ओलीज्यू, हामी तपाईका दुश्मन होइनौँ, विकासका साझेदार हौँ । हामीले गरे जति विकासका सबै काम पनि तपाईकै कार्यकालमा भएका हुन् भनिदिउँला । तर त्यसो भन्दा पत्याउने बनाउन आग्रह, पुर्वाग्रहबाट मुक्त भएर विकासमा साझेदारी गरि त्यो दाबी गर्न सक्ने ल्याकत बनाउने जिम्मा तपाईकै हो । अनि जति भ्रम फैलाए पनि, हामी तपाईको भ्रष्ट कार्यकर्तासँग झुक्दैनौँ । महानगरलाई जतिसुकै नाकाबन्दी लगाउनुहोस्, नियतमा फरक पर्दैन । अहिलेका लागि देशमा आवश्यक सबै भन्दा ठुलो कुरा सुशासन हो । भ्रष्टहरूविरूद्धको लडाइँ हो ।
सुशासनका लागि जोसँग जुध्नु परे तयार छु, तर सम्झौता गर्दिन । सुशासन कायम गरेरै छोड्छु ।
